|
Акафистник
Месяцеслов
Молитвослов
Псалтирь
Словарь
Иконы |
Преподобный Галактион, Вологодский чудотворец (память 24 сентября по старому стилю)
Преподобный Галактион родился в Москве в царствование Иоанна Васильевича Грозного (1533-1584 гг.). По своему происхождению он принадлежал к самому знатному боярскому роду: отцом его был князь Иоанн Иоаннович Бельский, потомок Литовских князей. При крещении отроку наречено было имя Гавриил. Отец его подвергся царской опале и был казнен, когда отроку было семь лет. Родственники отвезли его в город Старицу, и он проживал там, скрывая от всех свое происхождение, и Бог хранил его. Благочестивый отрок усердно посещал храм Божий, ревностно изучал Божественное писание, а пропитание добывал себе ремеслом сапожника. Достигнув совершеннолетия, он сочетался браком с девицей из простого звания, но супруга его вскоре умерла, оставив после себя новорожденную дочь. Видя в этом указание свыше, Гавриил решился посвятить себя Богу. Он отдал дочь свою на воспитание родным, возложил на себя тяжелые вериги и начал подвизаться в посте и молитвах. Городских жителей он упросил дать ему небольшой участок земли близ посада на реке Содиме, поставил там себе небольшую келью и затворился в ней. Вскоре он принял иноческий постриг и наречен был Галактионом. Не оставив своего ремесла, он шил сапоги и заработанные деньги делил на три части: церкви, нищим и себе на пропитание. Своими руками он ископал близ кельи пруд, обсадил его деревьями и развел в нем рыбу. Дни свои инок проводил в трудах, а ночи — в непрестанных молитвах и песнях духовных. Благодать Божия просветила разум его, воздержание и пост усмирили плоть, уединение и безмолвие развили смирение, наполнили сердце его радостью и весельем. Жители города Вологды и окрестностей, узнав о дивном житии преподобного Галактиона, приходили, чтобы посмотреть на него, получить благословение, услышать слово назидания. А святой не довольствовался обычными иноческими подвигами: он приковал себя цепью к потолку своей малой хижины, так что не мог ни выйти куда-либо из своего затвора, ни лечь на пол; когда его одолевал сон, то он только преклонял колена и в таком положении, держась за цепь, на краткое время забывался дремотой. В редких случаях он покидал келью, как, например, однажды во время великой засухи, грозившей голодом, когда Вологодский владыка послал за ним просить, чтобы преподобный помолился о даровании дождя в храме со всем народом. Господь услышал молитвы праведника и всего народа и послал сильный дождь, напоивший истомленную зноем землю. Смутное время было тогда на земле русской: один за другим являлись самозванцы, а поляки и литовцы бродили по Руси и производили грабежи и насилия. Исполнившись дара прозрения, преподобный Галактион расковал свою цепь и в веригах явился в земскую избу, где собирался народ. Он советовал гражданам построить в один день на месте своих подвигов храм во имя Пресвятой Богородицы, и память чуда от иконы Знамения в Великом Новгороде, с верой в то, что Царица Небесная защитит город и избавит всех от нашествия иноплеменников. Однако жители Вологды не приняли благочестивого совета, а некоторые прямо обвинили святого в корысти — дескать, заботится он только о себе и ленится ходить в дальний храм. В ответ Галактион предсказал народу подробно о грядущих бедствиях, которые и произошли, когда вскоре, 22 сентября 1612 г., Божиим попущением, на Вологду напали поляки и литовцы. Они сожгли храмы, многих предали смерти, многих взяли в плен, не пощадили и угодника Божия. Набросившись на него с бешенством, вытащили его вон из кельи, волоча, нещадно били, поносили бранными словами, кололи мечами, сбросили ему на голову бревно с крыши здания. Видя приближение своей кончины, святой молил Господа простить ему все прегрешения и избавить от воздушных мытарств. Измученный врагами он преставился ко Господу с молитвой 24 сентября 1612 года. Благочестивые люди погребли его в келье, которую стали усердно посещать, так как Бог прославил чудесами Своего угодника. Вскоре по просьбам граждан Вологды архиепископ Вологодский Варлаам повелел написать житие святого, воздвигнуть храм в честь иконы Знамения Божией Матери на месте кельи его и собрать братию. При следующем архиепископе Маркелле построен был соборный храм во имя Святого Духа, по имени храма и монастырь стал называться Свято-Духовым. Служба святому была составлена в 1717 году.
Акафист святому преподобному Галактиону, Вологодскому чудотворцу
Кондак 1
Избранный от княжескаго рода и призванный в иночество скорбьми многими, угодниче Божий преподобномучениче Галактионе, в песнех восхваляем тя с любовию, небеснаго предстателя и заступника нашего; ты же, отче, яко имеяй дерзновение ко Пресвятей Троице, молися выну о спасении нас грешных и от всяких бед свобождай чтущих святую память твою, да зовем ти: Радуйся, преподобномучениче Галактионе, великий чудотворче.
Икос 1
Ангелов Творец и всего мира Создатель, провидев, яко сосуд избран имаши быти Божия благодати, отче Галактионе, от юности твоея многими скорбьми воспита тя в подвижника совершенна о Христе, сильнаго словом и делом пред Богом и человеки, нас же подвизает пети тебе: Радуйся, благородных родителей сыне; Радуйся, княжескаго рода святое прозябение. Радуйся, в отрочестве от смерти напрасныя Богом сохраненный; Радуйся, град отечествия твоего оставивый. Радуйся, праведно и непорочно на земли поживый; Радуйся, гражданство Иерусалима Небеснаго улучивый. Радуйся, преподобно-мучениче Галактионе, великий чудотворче.
Кондак 2
Видев кончину страдальческую родителя твоего и врагов лютость, искавших твоея погибели, отче Галактионе, ты же, подражая Христу, в младенчестве Своем бегавшему от гнева Иродова, избежал еси смерти горькия, благодарственно взывая ко Господу: Аллилуиа.
Икос 2
Разумев добре непостоянство благ мира сего прелестнаго, Галактионе богомудре, чести и славы и богатства уклонился еси и яко един от нищих во град Вологду пришел еси, в нем же пребывая, от труда рук своих не токмо сам питался еси, но и нищих снабдевал еси; о сем тя хвалим и зовем: Радуйся, кроткий Иисусов последователю; Радуйся, смиренный Христов подражателю. Радуйся, трудами праведными питавыйся; Радуйся, праздность душевредную возненавидевый. Радуйся, нищих питателю; Радуйся, убогих благодетелю. Радуйся, преподобномучениче Галактионе, великий чудотворче.
Кондак 3
Сила Божия в немощи твоей совершашеся, Галактионе преблаженне, егда благий ярем Христов на ся возложил еси и, веригами железными стягнув тело твое, в затвор тесный себе заключил еси, в молитвах непрестанных пребывая и выну вопия ко Господу: Аллилуиа.
Икос 3
Имел еси помысл чист и непорочную душу, отче преподобне, и ангелоподобное житие на земли проходил еси, смиряя плоть твою подвигами великими; темже яко воистину ангела земнаго и человека небеснаго тя ублажаем и глаголем: Радуйся, ангельскаго образа усердно возжелавый; Радуйся, в схиму святую облеченный. Радуйся, мечем молитвы непрестанно вооруженный; Радуйся, воине Христов непобедимый. Радуйся, вместо доспехов ратных веригами железными обложенный: Радуйся, вся искушения диавольская победивый. Радуйся, преподобномучениче Галактионе, великий чудотворче.
Кондак 4
Буря страстей не потопи корабля души твоея, Галактионе преблаженне, но веянием Святаго Духа направляем, в тихое пристанище безстрастия вшел еси и, безмолвное житие в затворе много лет препровождая, непрестанно воспевал еси Пресвятей Троице: Аллилуиа.
Икос 4
Слышавше прозорливыя твоя глаголы, отче преподобне, жители града Вологды о скорогрядущем на них гневе Божием, познаша тя, предстателя усерднаго за них ко Господу, и потщашася покаянием очистити себе от скверн греховных, тебе же, яко покаяния проповеднику, возглашаху сицевая: Радуйся, яко Иона, покаяние согражданом твоим проповедавый; Радуйся, яко Иеремия, о разорении града Вологды горце рыдавый. Радуйся, древним пророком равночестный; Радуйся, будущая яко настоящая провидевый. Радуйся, возшедый на высоту совершенства духовнаго; Радуйся, рабе Христов, верность Ему до конца сохранивый. Радуйся, преподобномучениче Галактионе, великий чудотворче.
Кондак 5
Боготечно, яко звезда путеводная, шествовал еси, преподобне отче, и примером жития твоего святаго многих ко Христу привел еси, ныне же всю страну Вологодскую благодатно озаряеши многими чудесы твоими. Не престай умоляти за ны Господа, о еже сподобитися и нам вкупе с тобою пети Ему: Аллилуиа.
Икос 5
Видевше исполнение пророческих твоих глаголов, дивно сбывшихся в разорении града Вологды от литовцев, сограждане твои, отче Галактионе, благоговейно воспоминаху твоя увещательная к ним словеса, ими же тщался еси привести их к покаянию, посту и молитве, в умилостивление праведно движимаго на них гнева Божия, темже и взываху тебе: Радуйся, молитвенниче ко Господу за люди согрешившия; Радуйся, провозвестниче воли Божией человеком. Радуйся, дивный провидче судеб Господних неисповедимых; Радуйся, усердный рачителю благолепия храмов Божиих. Радуйся, строение обители иноческия на мосте подвигов твоих предсказавый; Радуйся, клеветы напрасныя и посмеяние кротце претерпевый. Радуйся, преподобномучениче Галактионе, великий чудотворче.
Кондак 6
Проповедник был еси покаяния людем Вологодским, Галактионе блаженне, и страстотерпец добрый, положивый душу твою за град и люди единоверныя, убиен быв от злонравных литовцев, яко агнец незлобивый, и ныне во обителех райских светло ликуеши, вопия Богу: Аллилуиа.
Икос 6
Возсиял еси зарею многих чудес, преподобномучениче, и от раки твоея честныя благодатныя исцеления точиши всем, с верою приходящим; молим тя, угодниче Божий, уврачуй данною ти свыше благодатию и наши недуги душевныя и телесныя, да зовем ти: Радуйся, страстотерпче добропобедный, биение лютое от литовцев претерпевый; Радуйся, кровию твоею землю обагривый. Радуйся, по триех днех страдания телеснаго душу твою в руце Божии предавый; Радуйся, на месте подвигов твоих честно погребенный. Радуйся, вериги твоя и гроб твой цельбоносны явивый; Радуйся, радости скорбящим подателю. Радуйся, преподобномучениче Галактионе, великий чудотворче.
Кондак 7
Хотящим нам молитвы принести ко Господу, буди нам споспешник добрый, отче Галактионе, и яко же при жизни твоей, бездождию бывшу во граде Вологде, по молению архиерея и всего народа молитвою твоею дождь обилен у Господа испросил еси; тако и ныне проси нам милости у Всещедраго Владыки Христа, да благодарственно поем Ему: Аллилуиа.
Икос 7
Дивно бысть житие твое подвижническое и многострадальное, преподобне отче наш Галактионе, дивны суть и чудеса твоя, имиже прослави тя Господь по смерти, о них же недоумения благохвалити тя по достоянию, смиренно приносим ти глаголы сия: Радуйся, страны Вологодския Богом дарованный покровителю; Радуйся, правило преподобнаго иноческаго жития. Радуйся, молитв благоприятное кадило; Радуйся, бездождие молитвами разрешивый. Радуйся, дождь обилен и благорастворение воздуха у Господа испросивый; Радуйся, святыя обители твоея боголепное украшение. Радуйся, преподобномучениче Галактионе, великий чудотворче.
Кондак 8
Странно есть видети, преподобне, яко вода от кладезя, рукама твоима ископаннаго, недужными с верою приемлемая, целительна бывает. Молим тя, угодниче Божий, и нас, жаждою духовною палимых, напой водою Божия благодати, да принесем Владыце нашему плоды добрых дел и сподобимся благоприятно пети Ему: Аллилуиа.
Икос 8
Весь любовию Божественною преисполнен быв, Галактионе досточудне, ближних твоих искренно любил еси и усердно им благотворил еси, каковую же любовь твою к людям, ти сродным, и по смерти являти не престаеши, подвизая ны пети тебе: Радуйся, на высоту совершенства о Христе восшедый; Радуйся, мужу желаний духовных. Радуйся, сияющий, яко солнце, в Царствии Небеснем; Радуйся, мрак страстей разгоняющий в нас святыми твоими молитвами. Радуйся, ведущий нас невидимо на стезю благоугождения; Радуйся, реко исцелений благодатных. Радуйся, преподобномучениче Галактионе, великий чудотворче.
Кондак 9
Вси ангели Божии и святых лицы восприяша тя с любовию в сожитие райское, страстотерпче преподобне, егда биенный люте от нечестивых литовцев дух твой испустил еси и Сам Творец ангелов венцем славы небесныя увенча тя, Ему же помолися, преподобномучениче, да и нас смиренных не лишит Он наследия Царства Небеснаго и пения Ему со святыми: Аллилуиа.
Икос 9
Витии суесловнии, глаголавшии на тя стропотная и прекословная, преподобне отче, по неложному предсказанию твоему, посрамишася и погибоша, ты же радостно пребывавши со святыми и память твоя чествуется с похвалами до днесь, на месте же подвигов твоих обитель иноческая красуется, яко же предрекл еси, и благоукрашенныя храмы Божии стоят, в них же славословие Божие совершается, тебе же приносятся хвалебныя песни сицевыя: Радуйся, горняго мира украшение; Радуйся, дольняго мира заступление. Радуйся, иноков слава и похвала; Радуйся, постников удобрение. Радуйся, крови твоея излиянием град Вологду освятивый; Радуйся, неверныя знаменьми грозными устрашаяй. Радуйся, преподобномучениче Галактионе, великий чудотворче.
Кондак 10
Спастися всем нам помолися, преподобне, и не престай ходатайствовати за нас пред Престолом Пресвятыя Троицы, яко имый дерзновение к Триипостасному Владыце; молимся тебе прилежно, помози нам грешным странствие земное благочестно скончати и во славе Царствия Христова вечно пети Богу нашему: Аллилуиа.
Икос 10
Стеною молитв твоих небесных град Вологда ограждается и святая обитель твоя нерушимо пребывает, вси же, чтущии тя, у гроба твоего утешение получают, Галактионе многострадальне, темже приемлюще от тебе множество даров Божия благодати, благодарственно взываем: Радуйся, милосердия Христова подражателю; Радуйся, вечныя блаженныя жизни наследниче. Радуйся, радости святых сопричастниче; Радуйся, венца мученическаго сподобивыйся. Радуйся, благодати Божия таинниче; Радуйся, Пресвятыя Троицы верный исповедниче. Радуйся, преподобномучениче Галактионе, великий чудотворче.
Кондак 11
Пение ангельское слышиши и доброту райскую созерцаеши, преподобне отче Галактионе, отнудуже и наше пение смиренное услыши, прося нам свыше у Господа великия и богатыя Его милости, да присно благодарим тя, предстателя нашего, и вопием Богу: Аллилуиа.
Икос 11
Светлыми лучами чудес сияеши, Галактионе богоносне, и ими выну озаряеши души верных, с усердием и любовию приходящих к цельбоносному твоему гробу; не мним бо тя мертва суща, но жива о Христе, внемлюща гласом нашим хвалебным и вопиющим таковая: Радуйся, святче Божий, со святыми почиваяй; Радуйся, избранниче Христов, земнородныя благоутробно посещаяй. Радуйся, по успении твоем чудесы многими святость твою показавый; Радуйся, от гроба твоего струи целебныя источивый. Радуйся, различныя болезни исцелеваяй; Радуйся, во всяких бедах скорый помощниче. Радуйся, преподобномучениче Галактионе, великий чудотворче.
Кондак 12
Благодать, данную ти от Бога, врачевати недуги душевныя и телесныя прославляем, отче Галактионе; не забуди нас, усердно призывающих тя, во время тяжких обстояний и в час смерти нашея не остави нас молитвами твоими, да в радости вопием Богу: Аллилуиа.
Икос 12
Восхваляем великия твоя подвиги, ублажаем мученическую кончину твою, святе Галактионе, и с несомненною верою припадая к цельбоносному гробу твоему, величающе тя зовем: Радуйся, Пресвятыя Живоначальныя Троицы великий угодниче; Радуйся, Пресвятыя Владычицы Богородицы изрядный слуго. Радуйся, ангельских ликов собеседниче; Радуйся, всех святых сожителю. Радуйся, свеще, в молитвах к Богу возженная; Радуйся, душ наших к Царствию Горнему руководителю. Радуйся, преподобномучениче Галактионе, великий чудотворче.
Кондак 13
О пречудне и богоносне отче наш Галактионе, заступниче наш теплый и молитвенниче непрестанный. Приими от нас милостиво малое сие моление и сохрани всех нас от врагов видимых и невидимых, от всякия скорби, напрасныя смерти и будущия муки; да сподобимся с тобою и со всеми святыми воспевати Богу: Аллилуиа.
(Этот кондак читается трижды, затем икос 1 и кондак 1)
Молитва святому преподобному Галактиону, Вологодскому чудотворцу
Преподобне и богоблаженне отче наш Галактионе, крепкое страны нашея ограждение, христиан православных поборниче и теплый за нас грешных ко Всемилостивому Богу нашему Иисусу Христу и Пречистой Матери Его, Владычице нашей Богородице и Приснодеве Марии молитвенниче. Умиленно молимся тебе, преподобне, не забуди нас грешных и недостойных рабов твоих, но яко заступник и ходатай усердный, призри милостивно на немощь нашу и испроси молитвами твоими у Христа Бога нашего, да освятит благодатию Своею души и телеса наша, ум наш просветит светом богоразумия, совесть нашу очистит от мертвых дел, от греховных помышлений и губительнаго уныния, и дарует нам искреннее покаяние, сердцу сокрушение, слезы и умиление, воздержание и трезвость, смиренномудрие и кротость, чистоту душевную и телесную, нищелюбие и страннолюбие, и друг другу нелицемерную любовь. О всеблаженне отче Галактионе, сподоби нас шествовати путем спасения, да твоими молитвами преблагий Христос Бог наш покажет на нас, грешных, благодать и милость Свою, и всяческих зол и будущаго мучения нас свободит, и сподобит наследником быти Царствия Своего Небеснаго славящих и величающих Его купно с Безначальным Его Отцем и Пресвятым и Благим и Животворящим Его Духом, ныне и присно, и во веки веков. Аминь.
Тропарь преподобному Галактиону Вологодскому
Тропарь, глас 5
Днесь град Вологда тобою всемирне хвалится, возсиял бо еси пресветло яко солнце и чудесы твоими град и веси, преподобне Галактионе, озарил еси. И ныне молися Господеви избавитися душам нашим от прелести вражия спастися граду нашему от поганскаго и всех противных наития, и испроси у Христа Бога любовию чтущим тя прегрешений прощения и просящим твоея помощи от всякия скорби избавление, и вопиющим к тебе: Бог наш с нами, прославивый угодника Своего, яко же благоволи. |
|
© Храм в честь Святой мученицы Фотинии Украинской Православной Церкви. |